قصيدة زجلية بعنوان ---يا نفسي واش بيك راكي تامري

يا نفسي واش بيك راكي تأمري
يا نفسي واش بيك راكي تأمري****و تبعتيني لشيطان ما يبغي وهواه
كنت انا تايق فيك وأنت تغدري****و دخلتيني في بحر غارق لياه
كنت انا زاهي بيك ونقول ياصغري****نحساب أنا ذالصغر يدوم لمولاه
يامي نقصان تمشي من عمري****نحساب أنا ذالوعد يدوم يا حصراه
اشتد العضد و قلت ذا فخري****الصحة والصغر نحقق ما نرجاه
مرعرع صغير وزايغ بصري****تابع الملعون مستعجب بلغاه
فارح بشبابي و انايا عزري****وندير غي لي بغا عقلي وشتاه
تابع الملعون هايم ما ندري****ونسيت القران وما قال الله
انسيت الصلاة ونواض الفجري****في هذاك الوقت نومي جا محلاه
هملت الخمسة وهملني فكري****ونقول انا ذالوقت موحال لا نقاه
تابع الدنيا و موراها نجري****هاذ الجري طويل والجاري عياه
حالك يا دنيا صعيب وتغدري****يا ويح لي تاق في وادك داه
بمحاسن تزيان هوالك تمكري****ويا ويح لي غواه جمالك وهواه
هذا حالي فيك سودتي زهري****ورميتيني في واد غارق يا معتاه
لعبتي بشبابي وضيعتي صغري****ومشالي فاللهو راه بليس داه
مع احبابي واهلي طيحتي قدري****عافوني لصحاب قالو ذاك علاه
حشمتك بالله يا نفسي هدري****وعبدالله كفاش يجاوب مولاه
عييت نراود فيك يا نفسي صبري****شدي في مولاك راه الحق معاه
عييت نخالي فيك نفهم و نقري****دخلي في طاعة الخالق ورضاه
ساعة انت خبيتة وبحبال تجري****تديني للفعل لي بغضو ونهاه
قوليلي كفاش نجاوب في قبري****عند الملكين سؤالي نرجاه
منكر ونكير ثمة تحضري****يتلف كلامي ونولي مهماه
من عملك يانفس ظلمتي قبري****لاشمعة لاضو لاقنديل ضواه
في هذاك اليوم لله تسيري**** واش من وجه يقابل مولاه
واش جوابك يا نفس في يوم الحشري****فيهذاك اليوم يا وعدي معتاه
في هذاك اليوم ثمة تظهري****مكشوفة الجسد لاستر وغطاه
كتابك بين يديك تشوفي تنظري****و جميع لي دار شي ثمة يلقاه
ما ينفع لا مال ثمة يا عمري****وما ينفعش النسب ما ينفعش الجاه
ما ينفعش الكذب بجوارحي تهدري****ويقولو واه هاذ الشي درناه
ميزانك حسنات بيهم تنعبري****يا سعد لي دار الخير وخلاه
نفسي نفسي ترجى فالباري****والولد ثمة راه ينكر باه
يلا تدرتي شي خير ثمة تجبري****وتدخلي في شفاعة الطاهر وحماه
يلا درتي الغير لازم تصبري****وطلبي لكريم يسمح لك برضاه
يا ربي تغفر تمحي لي وزري****تغفرلي ذنبي غفرانك نرجاه
يا سيدي ربي عليك انا عاري****جبنالك محمد جبتهلك فالجاه
لا تجعل فالنار ثمة قراري****ذاك السكن اصعيب يا وعدي محماه
هاذ العبد ضعيف وانتيا داري****ويبغيك فالجنة تجعله مأواه
مول الكلمات صديقي بكري****عبد الله معروف سيد الشيخ باه
صلاة الرسول محلاها ذكري****ونختم بالسلام على بن عبد الله
تمت بتوفيق الله.
بقلم عبد الله بحوصي